Miqrantlarla bağlı qaydalarda hansı dəyişikliklər edildi? | Sərt qərar verildi

Rusiyada qanunsuz miqrasiyanın təşkili ağır cinayət kimi təsnif ediləcək.

Yerli medianın yaydığı məlumata görə, Dövlət Duması məsələ ilə bağlı 4 qanun qəbul edib.

Ölkənin Cinayət və Cinayət-Prosessual Məcəllələrində qanunsuz miqrasiya əleyhinə həyata keçirilən mexanizmlərinin təkmilləşdirilməsi üçün dəyişikliklər edilib.

Bununla da mütəşəkkil dəstə tərəfindən və ya ağır cinayətlər törətmək məqsədilə qeyri-qanuni miqrasiyanın təşkili ağır cinayətlər siyahısına daxil edilib. Bu cinayəti törədən şəxslər 8 ildən 15 ilədək azadlıqdan məhrum ediləcək.

Bunlarla yanaşı, sənədlərin saxtalaşdırılmasına və ya dövriyyəsinə, əcnəbi vətəndaşların saxta qeydiyyatı ilə bağlı cinayətlərə görə də məsuliyyətin artırılması üçün tədbirlər görüləcək.

Yeni qəbul olunan qanuna görə, vasitəçilərin miqrantlar üçün imtahanların təşkili və idarə edilməsində iştirakına tam qadağa qoyulub. Bu cinayəti törədənləri isə 2 ildən 6 ilədək həbs gözləyir.