Mirzoyan ölkəsi ilə Türkiyə arasında münasibətlərin normallaşmasından danışdı

Ermənistanın xarici işlər naziri Ararat Mirzoyan ölkəsi ilə Türkiyə arasında münasibətlərin normallaşması prosesinin davam etdiyini və yaxın gələcəkdə yeni tərəqqinin qeydə alına biləcəyini bəyan edib.

Parlament komissiyalarının birgə iclasında çıxış edən nazir İrəvan-Ankara dialoquna və son dövrlərdə görülən işlərə toxunub.

Türkiyə ilə danışıqların aktiv mərhələdə olduğunu bildirən A.Mirzoyan nəqliyyat sahəsindəki layihələrə diqqət çəkib:

"Türkiyə ilə dialoqumuz davam edir. Bu çərçivədə Gümrü-Qars dəmir yolunun yenidən işə salınması istiqamətində yaradılmış işçi qrupunun görüşləri və bir sıra digər təmaslar baş tutub".

Nazir münasibətlərin normallaşması prosesində tezliklə konkret nəticələrin əldə olunacağına inandığını vurğulayıb:

"Gözləntim ondan ibarətdir ki, çox yaxın gələcəkdə Türkiyə ilə münasibətlərimizin tam normallaşması istiqamətində mühüm irəliləyiş əldə edəcəyik. Bu prosesin öz məntiqi sonluğuna çatacağına inanıram".

Ermənistan XİN rəhbəri iki ölkə arasında artıq ticarət əlaqələrinin mövcud olduğunu da qeyd edib:

"Son hadisələrdən birini qeyd edim. Hazırda Ermənistanla Türkiyə arasında birbaşa ticarət mövcuddur. Coğrafi baxımdan bu ticarət hələlik üçüncü ölkələrin ərazisindən keçməklə baş tutsa da, gömrük qaydaları baxımından artıq birbaşa xarakter daşıyır".