"26 fevral qardaşlığı”: Bu silahların mümkün müharibədə təsir gücü nədir? | HƏRBİ XRONİKA

“Hərbi xronika” rubrikasının budəfəki buraxılışında fevralın 26-da Ermənistanın Baş naziri Nikol Paşinyanın Varşava səfəri çərçivəsində bu ölkənin xarici işlər naziri Ararat Mirzoyanın Polşanın milli müdafiə naziri Vladislav Kosinyak-Kamış ilə hərbi-texniki əməkdaşlıq sazişi imzalaması fonunda regionda formalaşan hərbi-siyasi vəziyyət diqqətə çatdırılıb.

Bildirilib ki, sazişin məhz fevralın 26-da və Varşavada imzalanması simvolik məna daşıyır. Çünki Polşa Ermənistanla diplomatik əlaqələri 1992-ci ilin 26 fevralında qurub. Bu məqam Ermənistanın beynəlxalq platformalarda səsləndirdiyi sülh ritorikası ilə paralel şəkildə hərbi əməkdaşlığı genişləndirməsi fonunda xüsusi diqqət çəkir.

Qeyd olunub ki, Polşa müdafiə sənayesi qısa mənzilli Hava Hücumundan Müdafiə sistemləri üzrə ixtisaslaşıb və Ermənistan üçün maraq doğura biləcək “Piorun”, “Poprad”, “Pilica+” kimi sistemlər istehsal edir. “Piorun” sistemi 10–4000 metr yüksəklikdə və 6500 metrədək məsafədə hava hədəflərini məhv etmək qabiliyyətinə malikdir və 2019-cu ildən Polşa Silahlı Qüvvələrinin arsenalındadır.

Buraxılışda vurğulanıb ki, İrəvanın Polşa ilə hərbi-texniki əməkdaşlıq çərçivəsində ən ciddi əməliyyat təsiri qazana biləcəyi istiqamət artilleriya komponentidir. Bu baxımdan 155 millimetrlik “Krab” artilleriya sistemi diqqət çəkir. Həmin sistem daha uzun mənzil və yüksək dəqiqlik imkanı ilə seçilir.

Analitiklərə görə Azərbaycanın Ermənistanla müqayisəsində regional hərbi balans hava üstünlüyü, PUA və yüksək dəqiqlikli zərbə vasitələri, elektron mübarizə imkanları, eləcə də logistika və komanda-idarəetmə inteqrasiyası ilə müəyyən olunur. Bu səbəbdən Ermənistan–Polşa hərbi-texniki əməkdaşlığı qısa və orta müddətdə müəyyən taktiki güclənmə yarada bilsə də, strateji səviyyədə güc nisbətini köklü şəkildə dəyişmək üçün daha genişmiqyaslı və uzunmüddətli proqramların icrası tələb olunur.