Mişel Traxtenberqin ölüm səbəbi üzə çıxdı | Dəhşətli faktların detalları

Amerikalı aktrisa Mişel Traxtenberqin ölüm səbəbi açıqlanıb.

BBC xəbər verir ki, şəkərli diabetin ağırlaşması səbəbi ilə vəfat etdiyi açıqlanıb.

Bu barədə Nyu-York şəhər tibbi ekspertizası məlumat yayıb. 39 yaşlı aktrisa bu ilin fevralında Nyu-Yorkdakı mənzilində huşsuz və reaksiyasız vəziyyətdə tapılmışdı.

Ailəsinin dini inancları səbəbi ilə onun üzərində autopsiya aparılmayıb. Lakin toksikoloji analizlər nəticəsində ölüm səbəbinin şəkərli diabetlə bağlı fəsadlar olduğu müəyyən edilib.

Ekspertiza orqanları hadisədə zorakılıq əlamətləri görmədikləri üçün ailənin autopsiya etirazına hörmətlə yanaşıblar.

Məlumata görə, aktrisa ölümündən əvvəl qaraciyər köçürülməsi əməliyyatı keçirmişdi. Lakin əməliyyatın dəqiq vaxtı və səbəbi açıqlanmayıb.

Mişel Traxtenberq xüsusilə "Buffy the Vampire Slayer" serialında canlandırdığı Don Samers obrazı ilə tanınırdı. Daha sonra "Gossip Girl" serialında Georgina Sparks rolu ilə tamaşaçıların yaddaşında qalmışdı.

Karyerasına uşaq yaşlarında "Harriet the Spy" filmi və digər Nickelodeon layihələri ilə başlayan aktrisa "EuroTrip", "Ice Princess", "Killing Kennedy" və "Sister Cities" kimi filmlərdə də rol almışdı.