Moskvada şübhəli şəxs partlayıcını işə saldı | Ölən və yaralılar var - Baku TV

Dekabrın 23-dən 24-nə keçən gecə Moskvanın cənubunda, Yeletskaya küçəsində yol polisi əməkdaşlarına məxsus xidməti avtomobilin yaxınlığında güclü partlayış baş verib.

İlkin məlumatlara görə, hadisə nəticəsində ikisi yol polisi əməkdaşı olmaqla üç nəfər aldıqları ağır xəsarətlərdən hadisə yerində ölüblər. Daha iki nəfər isə ağır vəziyyətdə xəstəxanaya yerləşdirilib.

Hadisə ilə bağlı Rusiya Federasiyasının İstintaq Komitəsi rəsmi məlumat yayıb. Bildirilib ki, xidməti avtomobilin yanında kustar üsulla hazırlanan partlayıcı qurğu işə düşüb. Partlayışın təsiri nəticəsində avtomobilin kuzovunda və asfalt örtüyündə çoxsaylı qəlpə izləri aşkarlanıb ki, bu da partlayıcının böyük dağıdıcı gücə malik olduğunu göstərir.

İstintaqın ilkin versiyasına əsasən, hadisə gecə saat 01:30 radələrində baş verib. Həmin vaxt iki yol polisi əməkdaşı xidməti avtomobilin yaxınlığında şübhəli hərəkətlər edən şəxs müşahidə edib. Onlar həmin şəxsi saxlamaq üçün yaxınlaşdıqları anda partlayıcı qurğu işə salınıb. Rusiya mətbuatında yayılan məlumatlarda qeyd olunub ki, həlak olan üçüncü şəxs partlayışı törədən şəxs ola bilər.

Hadisədən dərhal sonra ərazidə əməliyyat-istintaq qrupu fəaliyyətə başlayıb. Hadisə yeri tam nəzarətə götürülüb, videomüşahidə kameralarının görüntüləri götürülüb, şahidlərin ifadələri toplanıb. Rusiya İstintaq Komitəsinin Moskva üzrə Baş İstintaq İdarəsi faktla bağlı cinayət işi açıb. Hücumun hazırlanmasında və həyata keçirilməsində iştirak etmiş şəxslərin müəyyən edilməsi və saxlanılması istiqamətində əməliyyat-axtarış tədbirləri davam etdirilir.