Moskvadakı partlayışa görə saxlanılan şəxs nələri etiraf etdi? - Dəhşətli faktlar

Moskvanın şimalında avtomobilin partladılmasında şübhəli bilinən Rusiya vətəndaşı Yevgeni Serebryakov Türkiyənin Bodrum şəhərində ələ keçirilib.

Bu barədə Rusiya Federal Təhlükəsizlik Xidmətinin İctimaiyyətlə Əlaqələr Mərkəzi məlumat yayıb.

Bildirilib ki, iyulun 26-da beynəlxalq axtarışda olan 29 yaşlı Yevgeni Nikolayeviç Serebryakov Türkiyənin xüsusi xidmət və hüquq-mühafizə orqanlarının köməyi ilə Bodrumda saxlanılıb və Rusiyaya qaytarılıb. Şübhəli sonrakı təhqiqatın aparılması üçün prokurorluq əməkdaşlarına təhvil verilib.

O, açıqlamasında əməli törətmək üçün Ukrayna Kəşfiyyat Xidmətindən təlimat aldığını deyib: “2023-cü ilin fevralında mən Ukrayna kəşfiyyat xidmətləri ilə əməkdaşlıq etmək məqsədi ilə onlarla əlaqə saxladım. Sonradan İlya adlı bir nəfərlə ünsiyyətdə oldum. Güman edirəm, o, Ukrayna Kəşfiyyat Xidmətinin əməkdaşı idi. Mən əldəqayırma partlayıcı qurğu yaratmaq üçün komponentləri götürdüm. İlyanın nəzarəti və təlimatları ilə partlayıcı qurğu yığıb maşının altına qoydum. Buna görə mənə 10-20 min dollar və Ukrayna vətəndaşlığı vəd edilmişdi”.

Məlumat üçün bildirək ki, iyulun 24-də səhər saatlarında Moskvada, Sinyavinskaya küçəsində avtomobil partladılıb. Nəticədə nəqliyyat vasitəsində olan 2 nəfər yaralanıb.