NATO silah tədarükü ilə bağlı Kiyevə dəstəyini davam etdirəcək

“Rusiya döyüşdə Ukrayna üzərində qələbə qazana bilmir, buna görə də mülki əhaliyə və infrastruktura hücum edir”.

Bunu Ukraynanın müdafiə naziri Mixail Fyodorov Brüsseldə NATO-Ukrayna Şurasının qeyri-rəsmi iclasından əvvəl bildirib.

“Rusiya bizim mülki infrastrukturumuza, istilik və elektrik stansiyalarımıza zərbələr endirir. Bir sutka ərzində qarşı tərəf Ukraynaya 24 ballistik raket buraxıb. Lakin biz mübarizəni davam etdiririk”, – deyə o əlavə edib.

Fyodorov eyni zamanda göstərilən dəstəyə görə Alyansın Baş katibi Mark Rütteyə və bütün tərəfdaşlara təşəkkür edib. Nazir cəbhədə cüzi nəticələr əldə edən Rusiyanın canlı qüvvəsinin böyük itkilər verdiyini açıqlayıb.

Onun sözlərinə görə, Rusiyanın dekabrda 35 min, yanvarda isə 30 min hərbçisi məhv edilib.

Alyansın Baş katibi isə təlim və silah tədarükü məsələlərində NATO-nun dəstək göstərəcəyini vəd edib. Bundan başqa, Rütte qeyd edib ki, Alyans Ukraynanın innovasiyaların tətbiqi, döyüş və müdafiədə qabaqcıl texnologiyaların istifadəsi təcrübəsindən lazımi nəticə çıxaracaq.