Nikita Mixalkovun milyardlıq sərvətinin sirri | Rusiyadan qalmaqallı məlumat

Rusiyanın məşhur rejissoru və qara təbliğatçı Nikita Mixalkovun banklardakı əmanətləri 2,3 milyard rubldan (27 milyon 665 min dollar) çoxdur. Bununla yanaşı, o, illik yüzmilyonlarla rubl gəlir götürür və dövlət vəsaitləri hesabına dəbdəbəli həyat sürür.

Bu barədə Rusiyanın mühacir mediası məlumat yayıb.

Mixalkovun sahibi olduğu “TriTe” kinostudiyası uzun illərdir ziyan həddində fəaliyyət göstərsə də, ona ildə 300 milyon rubldan çox maaş ödəyir. Bununla yanaşı, büdcədən mütəmadi olaraq geri qaytarılmayan subsidiyalar alır. Həmin vəsaitlə çəkilən filmlərin çoxu isə kino seanslarında uğursuzluğa düçar olur.

Bundan əlavə, Mixalkov heç bir əməli fəaliyyət göstərmədən hər il 600 min rubl “bolvanka vergisi” kimi tanınan yığımlardan qazanır. Bu məbləğ Rusiya İntellektual Mülkiyyət Sahibləri İttifaqı tərəfindən texnika və məlumat daşıyıcılarından toplanan haqlar hesabına ödənilir.

Rusiya Federal Vergi Xidmətindən sızan məlumata görə, Mixalkovun bankdakı yığımları 2,3 milyard rubldan çoxdur. Bu pullar faiz gəlirləri ilə hər il rejissora yüzmilyonlarla əlavə qazanc gətirir.

Dövlətin təbliğatçısı kimi çıxış etməsinə baxmayaraq, müharibədən və sanksiyalardan əvvəl Mixalkov mütəmadi olaraq NATO ölkələrinə – İtaliya, Fransa, İspaniya və Böyük Britaniyaya istirahətə gedirdi. O, səfərləri üçün saatda milyonlarla rubla başa gələ bilən biznes-cetlər icarəyə götürürdü. Xüsusilə, İspaniyanın Valensiya şəhəri Mixalkovun sevimli məkanlarından olub – o, 10 il ərzində oraya ən azı 10 dəfə gedib.

Mixalkovun xaricə uçduğu “Bombardier Challenger 850” (RA-67244) təyyarəsi ukraynalı oliqarx Sergey Kurçenkoya bağlıdır. Kurçenko sabiq Ukrayna prezidenti Viktor Yanukoviçin “pul kisəsi” hesab olunur və Donetsk separatçılarının lideri Aleksandr Zaxarçenkonun qətlində sifarişçi kimi də adı hallanır.

Araşdırmaya görə, Mixalkov dövlət subsidiyaları, vergi yığımlarından pay və milyardlıq faiz gəlirləri hesabına zənginləşsə də, dəbdəbəli həyatını əsasən Qərb ölkələrində yaşayıb.