Nüvə silahı üçün... | İranda vurulan obyektdə nə istehsal edilirdi?

Xəbər verdiyimiz kimi, iyunun 19-u səhər saatlarında İsrail İranın mərkəzi əyalətindəki nüvə proqramının bir hissəsi olan obyektə hücumlar həyata keçirib.

“Əl-Cəzirə” burada yerləşən obyekt haqqında bəzi əsas faktları bölüşüb.

“Ərak” ağır su reaktoru Tehrandan təxminən 190 kilometr cənub-qərbdə yerləşir. Tikinti 2000-ci illərin əvvəllərində İranın nüvə proqramının bir hissəsi olaraq başlayıb. Bura ağır su istehsalı zavodu və ilkin olaraq “IR-40” reaktoru daxildir.

Ağır su reaktoru izotop istehsalı və əlavə məhsul kimi plutonium istehsalına imkan verir.

Birləşmiş Millətlər Təşkilatı, Avropa İttifaqı və Birləşmiş Ştatlar bununla bağlı narahatlıqlarını ifadə ediblər. Çünki plutonium nüvə silahının hazırlanmasına kömək edə bilər.

2015-ci il Birgə Hərtərəfli Fəaliyyət Planına əsasən, İran reaktoru dinc məqsədlər üçün yenidən dizayn etməyə və təyinatını dəyişdirməyə, plutonium hasilatını məhdudlaşdırmağa razılaşıb.

Qeyd edək ki, ağır su ağır hidrogen atomlarını ehtiva edən sudur. Bu su bəzi nüvə reaktorlarında moderator kimi istifadə olunur.