O, Britaniyada altmışıncı illərin simvolu sayılırdı

O, Kaliforniyanın parlaq rəngli təsvirləri ilə 20-ci və 21-ci əsrlərin ən məşhur sənətçilərindən biri kimi yadda qaldı.

Qalın çərçivəli eynək, qızılı gödəkcə və kürən saçlı obrazı ilə Britaniyanın altmışıncı illərinin simvoluna çevrilmişdi. Bəli, söhbət britaniyalı rəssam, qrafik, səhnə dizayneri, fotoqraf və pop-art cərəyanının görkəmli nümayəndəsi Devid Hoknidən gedir.

Hokni 20-ci əsrin ən nüfuzlu rəssamlarından biri hesab edilir. Sənətkar iyunun 11-də 89 yaşının tamamına cəmi 1 ay qalmış dünyaya gözlərini əbədi yumdu.

Devid Hokni 1936-ci ildə Şimali İngiltərənin Bredford şəhərində anadan olub. Atası hesabdar və həvəskar rəssam olub və Hokninin rəssam kimi formalaşmasında mühüm rol oynayıb.

O, 1948-ci ildən rəssam olmağa qərar verir və məktəb üçün rəsmlər və plakatlar hazırlayır və 1953-cü ildə Bredford Rəssamlıq Məktəbinə daxil olur. 6 il sonra isə Londonda incəsənət üzrə təhsil alır.

1963-cü ildən artıq tanınmağa başlayır. Amerika rəssamlıq məktəbindən təsirlənən Devid Hokni Kaliforniyaya gedir. 1967-ci ildə "Piter hovuzdan çıxır" əsəri ilə Los Anceles üzgüçülük hovuzlarının rəsmlər seriyasını çəkir. Bu əsərlər ona dünya şöhrəti qazandırır.

1982-ci ildə Parisdə keçirilən "Devid Hokni - Fotoqraf" sərgisi və "Devid Hokni: Fotolar" kitabı onu fotoqraf kimi də tanıdır. Yorkşir qraflığının təbiət mənzərələrini həm boyalı fırça, həm də foto ilə çəkməsi onun sənətini daha da ucaldır.

Qeyd edək ki, 2018-ci ildə onun "İki fiqurlu hovuz" əsəri hərracda 90.3 milyon dollara satılaraq, həmin dövr üçün onu dünyanın "ən bahalı canlı rəssamı" etmişdi.