Onu tənqid edənləri belə heyran qoyan memar | "Əyribucaqların kraliçası" Zaha Hadid - ARAŞDIRMA

1950-ci ildə Bağdadda anadan olan Zaha Hadid uşaqlığını Beyrutda keçirir və burada riyaziyyata marağı onu memarlığa yönəldir.

1972-ci ildə Londona köçərək burada Memarlıq Assosiasiyası Məktəbində təhsil alır, daha sonra isə öz studiyasını – “Zaha Hadid Architects”i yaradır.

O, Almaniyanın Volfsburq şəhərində “Phaeno” Elm Mərkəzi, Çinin Quanqcou şəhərində Opera Teatrı, Bakıda Heydər Əliyev Mərkəzi kimi möhtəşəm layihələrə imza atır.

Zaha Hadidin möcüzələrindən biri olan Heydər Əliyev Mərkəzinin layihəsi 2007-ci ildə hazırlanır və 2012-ci ildə istifadəyə verilir. 2014-cü ildə isə bu tikili “Design of the Year” mükafatına layiq görülərək dünyanın ən yaxşı binası seçilir.

Heç vaxt ailə qurmayan Zaha Hadid həyatını yaradıcılığa həsr etmiş, həmçinin geyim, avtomobil və mebel dizaynı ilə də məşğul olmuşdur.

O, 2016-cı ildə ABŞ-nin Mayami şəhərində vəfat edir. Ölümündən sonra isə studiyasının rəhbərliyini Patrik Şumaxer ələ alaraq Z.Hadidin yarımçıq qalan 36 layihəsini davam etdirir.