Heydər Əliyev Mərkəzi

Heydər Əliyev Mərkəzi Bakı şəhərindəki Heydər Əliyev prospektində yerləşən araşdırma və beynəlxalq dialoq mərkəzidir. Mərkəzin layihəsi 2007-ci ildə İraq əsilli britaniyalı dünyaşöhrətli memar Zaha Hadid tərəfindən işlənmiş, tikintisi 2007-ci ildə başlanmış, bina 2012-ci il mayın 10-da — ümummilli lider Heydər Əliyevin anadan olmasının 89-cu ildönümündə istifadəyə verilmişdir. Kompleksin tikintisinə təxminən 250 milyon ABŞ dolları sərf edilmişdir.

Arxitektura

Düz xətlərdən tamamilə imtina edilmiş binanın quruluşu yerdən dalğavari şəkildə səmaya doğru yüksəlir, sonra isə süzülərək yenidən yerə qovuşur. Bu forma postmodern memarlıq tərzini əks etdirməklə yanaşı, davamlılığı və keçmişlə gələcəyin bağlılığını simvolizə edir. 57.500 kvadratmetr sahəni əhatə edən kompleks Pritzker mükafatı laureatı Zaha Hadidin dünyanın ən tanınan əsərlərindən biri sayılır. Bina 10 hektarlıq ictimai parkın ərazisindədir.

Kompleksin tərkibi

Mərkəz özündə iri konqres zalı, Heydər Əliyev Muzeyi, sərgi salonları və inzibati ofisləri birləşdirir. Heydər Əliyev Muzeyinin dizaynında müasir texnologiyalar tətbiq edilmiş — burada ümummilli liderin sovet dövrü və müstəqillik illərindəki fəaliyyəti virtual formada təqdim olunur. Həmin dövrdə çəkilmiş filmlər üçün xüsusi texniki zallar fəaliyyət göstərir.

Sərgilər və tədbirlər

Mərkəzdə Azərbaycan tarixi, müasir incəsənət, elm, texnologiya və innovasiya üzrə daimi və müvəqqəti ekspozisiyalar yerləşir. Bilet qiymətləri sərgi və tədbirə görə dəyişir. Mərkəz müasir Bakının əsas simvollarından biri hesab olunur.