Özəlləşdirmə prosesi üçün yeni təklif planı hazırlanır | Rusiyanın maliyyə nazirindən açıqlama

Rusiyanın maliyyə naziri Anton Siluanov ölkədə genişmiqyaslı özəlləşdirmə prosesinə başlamaq niyyətində olduqlarını bildirib.

O bu barədə Moskvada keçirilən tədbirdə çıxışı zamanı məlumat verib.

Nazir qeyd edib ki, Rusiyanın iqtisadi inkişafını təmin etmək üçün yeni strategiyalar hazırlanmalıdır. A.Siluanov bildirib ki, ötən il qeyri-effektiv aktivlərin müəyyən edilməsi istiqamətində işlər aparılıb və nəticədə, böyük bir özəlləşdirmə prosesi üçün təklif hazırlamaq qərarına gəliblər.

“Bizim fikrimizcə, 2025-ci ildə özəlləşdirmə məsələsini gündəmə gətirmək üçün yaxşı zamandır”, – deyə o vurğulayıb.

A.Siluanov həmçinin məhkəmə qərarları ilə müsadirə edilmiş şirkətlərlə bağlı da danışıb və bu şirkətlərin satışından təxminən 100 milyard rubl (təxminən 1,2 milyard dollar) gəlir gözlədiklərini bildirib.

Xatırladaq ki, 2023-cü ildə Maliyyə Nazirliyi yeni özəlləşdirməyə ehtiyac olduğunu açıqlamışdı. 2024-cü il özəlləşdirmə prosesi nəticəsində 130 milyard rubl gəlir əldə edildiyi bildirilib. Qonşu ölkədə ən böyük özəlləşdirmə isə 33 il əvvəl, 1992-ci ilin oktyabrında reallaşıb. Dövlət müəssisələri kütləvi özəlləşdirilib.