Paşinyan Ermənistanın məhv olma səbəbindən danışdı | Ordunu sevdiyimizə görə bunu etmirik…

44 günlük müharibə zamanı könüllü dəstələr yaradaraq döyüş meydanına çıxmaq üçün çağırışlar edən Nikol Paşinyan indi könüllülüyü dövlətin məhv olmasının səbəbi hesab edir.

Bu barədə Ermənistanın Baş naziri parlamentdə çıxışı zamanı bildirib.

“Ümumiyyətlə, ordunun müqəddəsləşdirilməsi konsepsiyasının daşıyıcısı olmuş, sonra isə acı reallıqla üzləşmiş bir şəxs kimi sizə bu yanaşmanı dayandırmağı məsləhət görürəm. Bu, vaxtilə hamımızın yol verdiyi və çox ciddi bir səhvdir.

Orduya hörmət, ehtiram və qayğı ilə yanaşmaq lazımdır. Lakin ordu müqəddəslik obyekti olmamalıdır. Bu, gözümüzü kor edir və biz öz problemlərimizi, o cümlədən də ordunun uzunmüddətli tənəzzülünü görmürük.

Biz deyirik ki, ordu hərəkət edər, dərdini mən çəkərəm, əsgərlər də qısılmış, donmuş halda Madaqaskara qədər gedərlər. Düşünməyin ki, biz ordunu sevdiyimizə görə bunu edirik. Yox, bu belə deyil. Biz yalnız və yalnız səhvlərimizi o yazıq əsgərin, ordunun üstünə atmaqdan başqa heç nə etmirik”, – deyə o qeyd edib.

N.Paşinyan onu da bildirib ki, Ermənistanın Müdafiə Nazirliyi ölkədə 10 böyük vergi ödəyicisindən biridir. Baş nazir bu göstəricini erməni cəmiyyətində olan problemlərin nəticəsi kimi qiymətləndirib.