Pentaqon İranda quru əməliyyatlarına hazırlaşır? - Baku TV

Pentaqon İranda həftələrlə davam edəcək quru əməliyyatlarına hazırlaşır.

Bu barədə "The Washington Post" qəzeti Amerika rəsmilərinə istinadən məlumat yayıb.

D.Tramp Administrasiyası İrandakı müharibənin beşinci həftəsinə qədəm qoyduğu bir vaxtda ABŞ dəniz piyadalarını Yaxın Şərqə göndərib və həmçinin ABŞ Ordusunun 82-ci Hava-Desant Diviziyasından minlərlə əsgəri bölgəyə ezam etməyi planlaşdırır.

Vurğulanıb ki, Pentaqon İranda məhdud quru əməliyyatları üçün variantları araşdırır.

Qeyd olunub ki, D.Tramp Administrasiyası İranın ən böyük neft terminalının yerləşdiyi Xarq adasının ələ keçirilməsi və Hörmüz boğazının sahil zonasına basqınlar da daxil olmaqla müxtəlif mümkün ssenariləri müzakirə edir. Buraya həmçinin kommersiya və hərbi gəmilərə hücum etmək üçün istifadə edilə bilən və gəmiçilik üçün təhlükə yarada biləcək silahların axtarışı və məhv edilməsi daxildir.

Nəşrin məlumatına görə, mənbələr bu cür əməliyyatların ehtimal olunan müddəti ilə bağlı fikir ayrılığına malikdir. Bir mənbə təyin olunmuş tapşırıqların yerinə yetirilməsinin bir neçə həftə, digəri isə bir neçə ay davam edə biləcəyini düşünür.

Lakin ABŞ Prezidenti Donald Tramp hələlik bu cür planların həyata keçirilməsini təsdiqləməyib və Amerika qoşunlarının İrana yerləşdirilməsi ilə bağlı qərarın verilib-verilməyəcəyi hələ də məlum deyil.