Pezeşkian İrana edilən təzyiqlərdən danışdı

"Qonşularımızla münasibətlərimiz əvvəlkindən xeyli yaxşıdır".

Bunu İran Prezidenti Məsud Pezeşkian çıxışı zamanı deyib.

Onun sözlərinə görə, İrana qarşı aparılan müharibə, ABŞ-nin tətbiq etdiyi blokada və edilən təzyiqlərdən sonra İranın çökməsi gözlənilirdi.

"Onlar uzun illərdir iqtisadi təzyiqləri artırır və ölkəmizi çətin vəziyyətə salmağa çalışırlar. Hazırkı hökumət dövründə bu təzyiqlər maksimum həddə çatıb. Lakin qarşıladıqları mənzərə onların təəccübünə səbəb olub və hər biri eyni sualı səsləndirir – İran niyə çökmədi? Onu da deyim ki, ABŞ-nin hücumları və tətbiq etdiyi mühasirədən sonra qonşu ölkələrlə münasibətlərimiz daha da yaxşılaşıb. Nəticə etibarilə ticarət marşrutları yaradılıb və genişləndirilib. ABŞ-nin planlarından biri də İranın şimal-qərb və cənub-şərq sərhədləri vasitəsilə ölkədə sabitliyi pozmaq olub. Lakin qonşu dövlətlər buna imkan verməyib", – deyə Pezeşkian bildirib.

İranın dövlət başçısı sanksiyalara da toxunaraq qeyd edib ki, neft ixracının məhdudlaşdırılması ölkənin valyuta gəlirlərini azaldır və bu da iqtisadi çətinliklər yaradır.