Pezeşkian xalqa müraciət etdi | Hökuməti bu cür qurmaq istəyirik!

Məsulların seçilməsi və təyinatı problemə çevrilib, peşəkar kadrların təklif olunmasını istəyirik. Ancaq hər kəs öz tanışını önə çəkir, bilmirəm, necə edək, axı biz milli birlik hökuməti qurmaq istəyirik.

Bu sözləri İran Prezidenti Məsud Pezeşkian seçki qərargahlarının üzvləri ilə görüşündə deyib.

O, ölkənin bir qrup və siyasi cərəyana bağlı şəxslər tərəfindən idarə edilməsinin əleyhinə olduğunu vurğulayıb, insanların yalnız bacarıq və qabiliyyətinə görə irəli çəkilməsinin vacibliyi barədə əvvəlki fikirlərini təkrar edib.

Prezident onunla əlaqə saxlaya, görüşə və danışa bilməyənlərə də müraciət edib:

“Mən elə əvvəlki adamam, sadəcə indi sizlər mənim çiyinlərimə əlavə yük, məsuliyyət qoyubsunuz. Ona görə də gecə-gündüz çalışmağa məcburam və əlavə vaxt tapa bilmirəm. Bu, dəyişdiyim və sizləri unutduğum anlamına gəlməməlidir, sadəcə vaxt yoxdur. İş vaxtımdan kəsib sizlərə vaxt ayırsam, işləməməkdə günahlandıracaqsınız, əsas odur ki, işimizi yerinə yetirək. Xalqın razılıq səviyyəsi isə fəaliyyətimizin keyfiyyətinin göstəricisi və ölçüsü olacaq”.