“Mən məcburiyyətə inanmıram” | Məsud Pezeşkian

“Prezident Məsud Pezeşkian məcburi hicab qanununun icrası məsələsində konsensus yaradıb və bu məsələni həll edib”.

Bunu İran Prezident Administrasiyası rəhbərinin müşaviri Əli Əsgər Şəfiyian deyib.

O bildirib ki, İran cəmiyyəti plüralistdir və heç kim başqasının işinə qarışmamalıdır:

“Cəmiyyət özü tarazlıq yaradır, nəticədə, biz, siz və başqaları bir-birimizin geyiminə nəzarət edirik”.

Hökumət rəsmisi həmçinin vurğulayıb ki, Pezeşkian hicaba tam inanır və onun ailə üzvləri də tam örtülü geyinir.

Şəfiyianın sözlərinə görə, Pezeşkianın köməyi ilə ölkənin üç hakimiyyət qolu küçələrdə ciddi qarşıdurmanın qabağını ala bilib.

Xatırladaq ki, Məsud Pezeşkian oktyabrın 4-də “Fox News” telekanalına müsahibəsində hicab məsələsində məcburiyyətə inanmadığını söyləyib:

“Mən məcburiyyətə inanmıram və bunu praktiki hesab etmirəm. Heç vaxt kimisə nəyəsə məcbur edə bilməzsən. Ancaq ləyaqəti qorumaq və mədəniyyətlərə hörmət etmək bir-birimizdən gözləntimizdir. İndi ölkəmizdə yazılı qanunlar olmasına baxmayaraq, eyni çərçivədə bir tendensiya formalaşır. İnanc və iman baxımından inanıram ki, kimisə istədiyini etməyə asanlıqla məcbur edə bilməzsən”.