Pistorius Litvada hərbi təlimləri izləyib

Almaniyanın müdafiə naziri Boris Pistorius Litvada NATO-nun şərq cinahının müdafiəsinə həsr olunmuş “Freedom Shield” hərbi təlimlərini izləyib.

Belarus sərhədindən təxminən 20 kilometr məsafədə yerləşən Pabrade hərbi poliqonunda keçirilən təlimlərdə ümumilikdə səkkiz NATO ölkəsindən 2900-dək hərbçi və 800-ə yaxın hərbi texnika iştirak edir. Onlardan 2300-ü Almaniya Silahlı Qüvvələrinin hərbçiləridir.

Təlimlər çərçivəsində pilotsuz uçuş aparatlarının tətbiqi və onlara qarşı mübarizə üsulları sınaqdan keçirilir. Bu məqsədlə 300-dən çox drondan istifadə olunur. Dronların tanklar və digər ənənəvi silah sistemləri ilə birlikdə tətbiqi NATO-nun şərq cinahında mümkün döyüş şəraitinin real şəkildə canlandırılmasına xidmət edir.

Almaniya Rusiya-Ukrayna müharibəsindən sonra Litvada Almaniya hərbiçilərinin daimi yerləşdirilməsi barədə öhdəlik götürüb. Plana əsasən, Almaniyanın tank briqadası 2027-ci ilədək təxminən 4800 hərbçi və 200 mülki əməkdaşdan ibarət tam döyüş qabiliyyətli birləşmə kimi formalaşdırılmalıdır.

Hazırda Litvada Almaniya Silahlı Qüvvələrinin təxminən 1800 əməkdaşı xidmət edir.