Planetdə nələr yoxa çıxacaq? - Adi gözlə görə biləcəyik

Saturn planetinin halqaları 2025-ci ildə Yerdən müşahidə edənlərin gözündən iki dəfə itəcək.

Bu barədə Ka-Dar rəsədxanasının və astrofermanın elmi direktoru Stas Korotki bildirib.

Məlumata görə, Saturnun halqalarının tamamilə “yoxa çıxması” 2025-ci ildə iki dəfə – yaz və payızda baş verəcək.

“Məsələ burasındadır ki, bu planetin halqaları ilə eyni müstəvidə oluruq və bu zaman onları kənardan görürük, halqalar isə çox nazikdir – təxminən 30 metr qalınlıqda”, – deyə S.Korotki qeyd edib.

O əlavə edib ki, Yerdən Saturna qədər olan məsafə bir milyard kilometrdən çoxdur, ona görə də mahiyyət etibari ilə ən böyük teleskop vasitəsilə müşahidə olunsa belə, halqalar görünməyəcək.

Ekspertin sözlərinə görə, qarşıdan gələn hadisə nadir hallardandır və hər 15 ildən bir baş verir. Halqaların itməsi səkkiz ay fərqlə baş verəcək: 23 mart və 26 noyabr.

Qeyd edək ki, Saturn Günəşdən uzaqlığına görə altıncı, Günəş sistemində isə Yupiterdən sonra ikinci ən böyük planetdir. Nəhəng qaz planeti kimi təsnif edilir.

Planet Roma əkinçilik tanrısının şərəfinə Saturn adlandırılıb. Əsasən buz hissəciklərindən, eyni zamanda ağır elementlərdən və tozdan ibarət olan əhəmiyyətli bir halqa sisteminə malikdir. Saturnun ətrafında hazırda məlum olan 146 peyk fırlanır.