Pokrovsk şəhəri müharibənin qaynar nöqtəsinə çevrildi | Əhali təxliyə olunur

Rusiya-Ukrayna müharibəsinin hazırkı qaynar nöqtəsi Donetsk vilayətinin Pokrovsk rayonudur.

Bu rayona daxil olan Pokrovsk şəhəri uğrunda ölüm-dirim davası gedir.

Bəs şəhərin taleyi necə olacaq? Hazırda bütün dünyanı bu sual maraqlandırır.

Məlumat üçün bildirək ki, 60 min əhalisi olan Pokrovsk sakinlərinin çoxu təxliyə edilib, yaşayış binaları isə tərəflər arasında atışma mövqelərinə çevrilib.

Ukraynanın Pokrovskdakı hərbçiləri də elə dinc sakinlər qədər az saydadır. Bu isə müdafiə qabiliyyətini azaldır.

Rusiya Ordusunun Donetsk vilayətində irəliləməsinə baxmayaraq, hərbçi itkisi qeydə alınır. Pokrovsk ətrafında Rusiyanın 11 minlik ordu topladığı bildirilir. Şəhərə hücumlar isə kiçik dəstələr vasitəsilə həyata keçirilir.

Ukrayna Silahlı Qüvvələrinin Baş Qərargahından verilən məlumata görə, sutka ərzində döyüş qeydə alınan ərazilərdə Rusiya Ordusunun təxminən min hərbçisi məhv edilir. Onların bəziləri Pokrovsk və Mirnoqradda öldürülür.

İtkilərə baxmayaraq, Rusiya noyabrda Pokrovsku nəzarətə götürmək niyyətindədir. Bundan sonra Slavyansk və Kramatorsk da Rusiya üçün asan hədəfə çevriləcək. Mirnoqradın da itirilməsi ilə Ukrayna Ordusunun ölkənin bəzi yaşayış məntəqələri ilə əlaqəsi kəsiləcək.

Pokrovsk həm Rusiya, həm də Ukrayna üçün niyə bu qədər əhəmiyyətlidir?

Pokrovsk “Donetskin qapısı” adlanır. Bu şəhəri ələ keçirmək Rusiyanın bütün Donetsk vilayətinə nəzarət etməsinə imkan verəcək. Həm də əsas dəmir yolu qovşağı Pokrovskda yerləşir, Ukrayna Silahlı Qüvvələrinin ən mühüm təchizat mərkəzi də oradadır.

Bununla yanaşı, Pokrovsk Ukraynanın kömür sənayesinin mərkəzlərindən biridir. Əgər mədən, yaxud sənaye zonası itirilərsə, Ukraynanın polad istehsalı, sənaye bazası və dolayısı ilə iqtisadi dayanıqlığı ciddi şəkildə sarsıla bilər.

Nəticə etibarilə Pokrovsk yalnız müharibə meydanı yox, həm də Ukrayna iqtisadiyyatının çökməməsi üçün mübarizə meydanına çevrilib. Pokrovsk uğrunda döyüşlər Rusiya-Ukrayna müharibəsinin ən həlledici mərhələlərindən biri kimi tarixə düşəcək.