Polis etirazçılara qarşı gözyaşardıcı qazdan istifadə etdi | Bolqarıstan

Bolqarıstanın paytaxtı Sofiyada və ölkənin bir sıra digər şəhərlərində yenidən büdcə siyasətinə qarşı kütləvi aksiyalar keçirilib.

Yerli KİV xəbər verir ki, paytaxtda müxalifətin təşkil etdiyi dinc aksiyaya 20 mindən çox insan qatılıb. Etirazçılar hökumət, parlament və Prezident Administrasiyası binaları arasındakı ərazini tamamilə doldurublar.

Axşam saatlarında isə vəziyyət kəskin şəkildə pisləşib. Yürüş zamanı bir qrup maskalı təxribatçı hökuməti dəstəkləyən “Yeni başlanğıc” siyasi partiyasının ofisinin yerləşdiyi binanı qoruyan polislərə butulkalar, pirotexniki vasitələr və digər əşyalar atmağa başlayıblar.

Onlar həmçinin qapıları və pəncərəni sındıraraq içəri girməyə çalışıblar. Bu zaman polis onlara qarşı gözyaşardıcı qazdan istifadə edib.

Qeyd edək ki, etirazçılar parlamentin hazırda nəzərdən keçirdiyi 2026-cı ilin dövlət büdcəsi layihəsinə narazılığını bildiriblər.