Prezidentin qanunsuz göstərişlərini yerinə yetirməyin özü qanunsuzluqdur | Müxalifət lideri

Cənubi Koreya müxalifətinin lideri Li Çje-Mön hərbçiləri və polisi ölkə rəhbəri Yun Sok Yolun əmrlərinə tabe olmamağa çağırıb.

“Prezidentin ölkədə hərbi vəziyyətin tətbiqi ilə bağlı verdiyi qanunsuz sərəncamlar Konstitusiyanın və qanunun açıq şəkildə pozulmasıdır. Prezidentin bu cür qanunsuz göstərişlərini yerinə yetirməyin özü qanunsuz əməldir”, – deyə müxalifət lideri bildirib.

O həmçinin hərbi qulluqçuları və polis əməkdaşlarını qanuni vəzifələrini yerinə yetirməyə çağırıb.

Qeyd edək ki, Cənubi Koreya parlamenti ölkədə hərbi vəziyyətin ləğvinə səs verib. 300 deputatdan 190-ı Seulda daha öncə təhlükəsizlik qüvvələri tərəfindən mühasirəyə alınan parlament binasına daxil ola bilib. Keçirilən səsvermə əsasında hərbi vəziyyətin ləğvinin lehinə yetərli qədər say toplanıb. Cənubi Koreya Prezidenti Yun Sok Yol bundan əvvəl Şimali Koreya tərəfdarı olan qüvvələri təmizləmək və liberal konstitusiya quruluşunu qorumaq üçün hərbi vəziyyətin tətbiq edildiyini açıqlamışdı. Cənubi Koreyada yüzlərlə insan isə hərbi vəziyyətin tətbiqinə etirazlarını bildirmək üçün Seuldakı Milli Assambleyanın qarşısına toplaşıb. Bəzi etirazçılar prezidentin həbsi tələbi ilə çağırış ediblər.