Putin getdiyi yerlərə aşpazlarını da aparır | Qərb nəşrindən müəmmalı iddia

“Rusiya Prezidenti Vladimir Putin açıq havada keçirilən tədbirlərdə iştirak edərkən gülləkeçirməz jilet geyinir”. Bu barədə “The Moscow Times” məlumat verib.

Qeyd olunub ki, mühafizə xidməti hətta ona bunu etməyi ciddi şəkildə tövsiyə edir. Belə tədbirlərdə Prezidenti yaxından görən nəşrin həmsöhbətləri onun ən azı 2023-cü ildən sözügedən bədən geyimindən istifadə etdiyini iddia edirlər.

Moskvada keçirilən 9 May Qələbə Paradında V.Putinin videosunu araşdıran təhlükəsizlik üzrə ekspertin fikirlərinə görə, Kreml rəhbəri həmin tədbirdə belə güllə keçirməyən jilet geyinib.

Materialda Federal Təhlükəsizlik Xidmətinin həyata keçirdiyi digər təhlükəsizlik tədbirlərindən də bəhs edilir. Məlum olub ki, Kreml rəhbərinin şəxsi aşpazları hər zaman onunla birlikdə səfər edirlər, xüsusi qrupun əməkdaşları isə həmin yeməkləri əvvəlcədən yoxlayırlar.

Xəbərə görə, Rusiya Prezidentinin ətrafındakı mühafizəçilər çamadan kimi qatlanan zirehli qalxanlara belə sahibdirlər.

Nəşr iddia edir ki, Kreml rəhbərinin təhlükəsizlik xidməti bütün dünyada siyasətçilərə qarşı edilən silsilə hücumlardan narahatdırlar.