Putin Türkiyəyə gedəcək

Türkiyə Prezidenti Rəcəb Tayyib Ərdoğan rusiyalı həmkarı Vladimir Putinlə telefonla danışıb.

Bu barədə Türkiyə Prezidentinin mətbuat xidməti məlumat yayıb.

Görüş zamanı liderlər Vladimir Putinin Türkiyəyə səfəri ilə bağlı razılığa gəliblər. Rəcəb Tayyib Ərdoğan Rusiyalı həmkarına Türkiyədəki meşə yanğınlarının söndürülməsinə dəstək üçün 2 amfibiya yanğınsöndürmə təyyarəsi göndərdiyinə görə təşəkkür edib.

Türkiyə lideri rusiyalı turistlərin ölkəyə artan marağından məmnunluğunu ifadə edib və bu il ərzində birgə səylər nəticəsində turizmdə rekord qırılacağına inandığını bildirib.

Eyni zamanda o, Rusiya-Ukrayna müharibəsində gərginliyi artıracaq addımların atılmamalı olduğunu ifadə edib və Qara Dəniz Təşəbbüsünün əhəmiyyətini vurğulayıb. Prezident Qara Dəniz Təşəbbüsünün uzun müddət dayandırılmasının heç kimə fayda verməyəcəyini, ən çox da taxıla ehtiyacı olan və aşağı gəlirli ölkələrin zərər görəcəyini bildirib.

Rəcəb Tayyib Ərdoğanın sözlərinə görə, Türkiyə Qara Dəniz Təşəbbüsünün davam etdirilməsi üçün intensiv səylər və diplomatiya həyata keçirməyə davam edəcək.