Putin xarici mediaya niyə müsahibə vermir? | Peskovdan mühüm açıqlama

“Rusiya Prezidenti Vladimir Putinin xarici KİV-ə, o cümlədən amerikalı casus jurnalist Evan Qerşkoviçlə müsahibələri Moskvanı maraqlandırmır”.

Bu barədə dövlət başçısının mətbuat katibi Dmitri Peskov sentyabrın 9-da Kremldə jurnalistlərin sualını cavablandırarkən bildirib.

“Hələlik bizi belə bir müsahibə maraqlandırmır. Xarici mediaya və konkret jurnalistlərə müsahibə vermək üçün səbəb lazımdır. Hələlik belə bir səbəb görmürük”, – deyə rəsmi bildirib.

Amerikanın “The Wall Street Journal” qəzetinin yazdığına görə, Rusiyada həbs edilən şəxslərlə xaricdə həbs edilən rusların mübadiləsinin iştirakçılarından biri olan Evan Qerşkoviç əfv ərizəsində Vladimir Putindən müsahibə istəyib.

Kremldə Evan Qerşkoviçi Amerikanın casusu sayırlar və onun təqsirinin tam sübuta yetirildiyi bəyan olunub. Sözügedən mübadilə avqustun 1-də baş tutub. V.Putin Qərb həbsxanalarından xilas edilən ruslarla keçiddə görüşüb.

V.Putinin xarici mediaya müsahibə verməsinə gəlincə o bu ilin fevralında amerikalı jurnalist Taker Karlsona həftələrlə sensasion əks-sədası yayılan müsahibə verib.