Putin-Zelenski görüşündə müzakirə olunacaq 2 əsas məsələ

“Donald Tramp və mən Putinlə Zelenskinin istənilən halda görüşünə üstünlük veririk. Bütün məsələlər müzakirə olunmasa da, bəzən liderlərin üzbəüz görüşü dalana dirənmənin qarşısını alır”.

Bunu ABŞ-nin vitse-prezidenti Cey Di Vens bildirib.

Onun sözlərinə görə, görüşdə müzakirə olunacaq iki əsas məsələ var:

“Birincisi, Kiyev Rusiyanın bir daha Ukraynaya qoşun yeritməyəcəyindən əmin olmaq istəyir. Ukrayna öz ərazi bütövlüyünün uzunmüddətli toxunulmazlığını sığortalamaq niyyətindədir. Rusiya isə işğal etdiyi və hələ də tam nəzarətə götürə bilmədiyi bəzi ərazilərə iddialıdır. Müəyyən detallar məlumdur və onların üzərində iş gedir. Amma prezidentlərin eyni masa arxasında oturması üçün bütün məsələlərin aydınlaşdırılmasına gərək yoxdur.

Avropanın prosesdə iştirakından da danışan vitse-prezident qeyd edib ki, Donald Tramp da köhnə qitənin Ukrayna ilə bağlı aparıcı rol oynamasını gözləyir:

“O, açıq formada bildirmişdi ki, ABŞ dialoqa açıqdır, amma müharibənin dayandırılması üçün lazım olanları bilməyənədək bu məsuliyyəti üzərimizə götürməyəcəyik. Prezident təzyiq rıçaqlarını da əldən vermək fikrində deyil. Lakin Avropa ağır yükün altına girməlidir. Müharibə onların qitəsində gedir, Avropanın təhlükəsizliyi müzakirə mövzusudur”.