Putinin dünyanın nə vaxt dağılacağı ilə bağlı sualına cavab

Rusiya və Belarus prezidentlərinin iştirakı ilə Antarktidada Rusiyanın “Şərq” (Vostok) stansiyasının yeni qış kompleksinin istifadəyə verilməsi mərasimində Putin bəşəriyyətin yaxın 10 min ildə mövcud olmaq şansının olub-olmaması ilə bağlı sual verib.

Bu barədə “Rossiyskaya qazeta” məlumat yayıb.

Putin qeyd edib ki, buzlaqların dərin qazılması üçün hələ 70-ci illərdə yaradılmış unikal texnologiyalar son 420 min il ərzində istiləşmədən buzlaşmaya qədər 4 tam iqlim tsiklinin baş verdiyini təsdiqləyib.

Öz növbəsində Belarus Prezidenti Lukaşenko bəşəriyyətin hansı dövrdə olduğu ilə maraqlanıb: “Maraqlıdır, biz hansı dövrdəyik və hansı məqamdayıq, bu buzlaşma və ya istiləşmə bizə nə vaxt gələcək. Mən təkcə bizim deyil, planetin də mövcud olmasını çox istəyirəm”.

Putin isə “Bizim yaxın 10 min ildə mövcud olmaq şansımız varmı?”, – deyə soruşub.

Hər iki ölkənin liderlərini Rusiyanın təbii sərvətlər və ətraf mühit naziri Aleksandr Kozlov sakitləşdirib: “Buzlararası dövrdəyik və bu, 20 min illik istiliyə zəmanət verir. Artıq 10 mini keçdik, hələ də 10 min illik istilik dövrünə zəmanətimiz var”.

“Yaxşıdır, hər şey yaxşıdır”, – Rusiya lideri qeyd edib.