Putinin müharibə hədəsi Şərqi Avropanı təşvişə saldı

Rusiya Prezidenti Vladimir Putinin Ukraynanın F-16 təyyarələri əldə edəcəyi təqdirdə Şərqi Avropada 3-cü ölkələri hərbi hədəfə alacaqları ilə bağlı sərt xəbərdarlığı ciddi ajiotaja səbəb olub.

Nəzərə alsaq ki, F-16 qırıcılarının Ukraynaya tezliklə çatdırılması mövzusu aktual olaraq qalır, o zaman Rusiya liderinin belə bir xəbərdarlığı da təşviş yaratmaya bilməz.

Məsələ ilə bağlı slovakiyalı politoloq Yozef Hrabina Baku TV-yə açıqlama verib. O vurğulayıb ki, Rusiya uzunmüddətli qarşıdurmaya hazırlaşır.

“Rusiya şübhəsiz ki, sözünü reallaşdırmağa qadirdir və getdikcə bu risk artır. Ukrayna müharibəsində də görürük ki, Rusiya get-gedə hərbi potensialını artırır. Son zamanlar müasir texnologiyadan istifadə edir, ordusu getdikcə daha təcrübəli olur. Beləliklə, bu təhdidləri ələ salmaq əslində ağıllı strategiya deyil. Təbii ki, biz Rusiya ilə rəqabət apardığımızı başa düşməliyik. Rusiya uzunmüddətli siyasət aparır. Görünən odur ki, Rusiya logistik problemlərinin öhdəsindən gəldi, ordusu təcrübə qazandı və ordusuna daha çox adam cəlb etməyə çalışır. Bütün bunlar Rusiyanın uzunmüddətli qarşıdurmaya hazırlaşdığını göstərir”, – deyə politoloq bildirib.

Qeyd edək ki, Ukraynada gedən müharibənin nüvə müharibəsinə çevrilməsi və bunun qonşu ölkələrə də sirayət etməsi riski hələ də qalmaqdadır.