Putinlə demokratiya arasında seçim etməyin vaxtıdır | Finlandiya Prezidenti

“Avropa ya Rusiya və onun liderinin yaratdığı və dəstəklədiyi dünya nizamının lehinə, ya da demokratiya və azadlığın lehinə seçim etməlidir”.

Bunu Finlandiya Prezidenti Alexander Stubb Helsinkidə ATƏT-in konfransında çıxışı zamanı söyləyib.

Qeyd olunub ki, onun bu çağırışı Rusiya Prezidenti ilə münasibətləri saxlamağa çalışan bir neçə Avropa dövlətinin rəhbərlərinə ünvanlanıb.

"Bloomberg"in məlumatına görə, söhbət Macarıstanın Baş naziri Viktor Orban və Slovakiyanın Baş naziri Robert Fikodan gedir. Onlar Vladimir Putinə xüsusilə rəğbət bəsləyir və Ukrayna ilə bağlı Avropanın vahid mövqeyini pozurlar.

“Təsir dairələrinin hakim olduğu dünya düzəninə qayıdış o deməkdir ki, müstəqil demokratik dövlətlərin vətəndaşları öz qərarlarını verə bilməyəcəklər. Başqa dövlətin qeyri-demokratik rəhbərliyi bunu onlar üçün edəcək”, – deyə Stubb bildirib.

Finlandiya Prezidentinin sözlərinə görə, Rusiya ilə münasibətləri bərpa etmək üçün Ukraynada ədalətli və davamlı sülh lazımdır.