Putinlə Uitkoff arasındakı müzakirələr necə keçdi? | Uşakovdan vacib açıqlama

Rusiya Prezidenti Vladimir Putinlə ABŞ Prezidentinin xüsusi nümayəndəsi Stiven Uitkoff arasında görüş başa çatıb.

Bundan sonra Uitkoffu müşayət edən avtomobillər Kremlin ərazisini tərk edib.

Rusiya Prezidentinin köməkçisi Yuri Uşakov görüş barədə jurnalistlərə açıqlamasında bildirib ki, Vladimir Putin və Stiven Uitkoff Ukraynada nizamlanma, həmçinin iki ölkə arasında strateji əməkdaşlığın mümkün inkişaf perspektivlərini müzakirə ediblər.

“Prezident bu gün səhər saatlarında ABŞ nümayəndəsini qəbul etdi. Kremldə baş tutan görüşü faydalı və konstruktiv adlandırmaq olar. Müzakirə olunan mövzulara gəldikdə isə onu deyə bilərəm ki, birinci yerdə Ukrayna böhranı dayanırdı. İkinci isə ABŞ və Rusiya arasında strateji əməkdaşlığın mümkün inkişaf perspektivləridir. Biz tərəfdən Rusiya Ukrayna məsələsi ilə bağlı Amerika tərəfinə bəzi siqnallar ötürüldü. Eləcə də bu mövzu ilə bağlı ABŞ Prezidenti Trampdan müvafiq siqnallar alındı”, ‒ o qeyd edib.

Yuri Uşakov əlavə edib ki, müzakirələr üç saata yaxın davam edib. Görüşdə müzakirə edilən mövzular tam dəqiqliklə Donald Trampa çatdırıldıqdan sonra daha ətraflı məlumat verilə bilər.