Qəddafinin oğlunun ödədiyi girovun məbləği bəlli oldu

Mərhum Liviya lideri Müəmmar Qəddafinin oğlu Hannibal vəkilləri Livan məhkəməsinin təyin etdiyi 896 min dollar məbləğində girovu ödədikdən sonra azadlığa çıxıb.

Bu barədə "Almodon" xəbər portalı məlumat yayıb.

Qeyd olunur ki, Hannibal Qəddafi Təhlükəsizlik İdarəsinin binasını tərk edib və gücləndirilmiş mühafizə altında Beyrutdakı evinə yollanıb, orada ailəsi ilə birlikdə təxminən 10 gün keçirəcək. Qalan bütün prosedurlar başa çatdıqdan sonra o, şəxsi təyyarə ilə ehtimal ki, Birləşmiş Ərəb Əmirliklərinə uçacaq.

Bundan əvvəl məhkəmə orqanları 2015-ci ildən həbsdə olan Qəddafinin oğlunun azad edilməsi üçün 11 milyon dollar məbləğində girov tələb edirdi.

Qeyd edək ki, Müəmmar Qəddafinin oğlu Hannibal 2015-ci ildən Livanda həbsdədir. 50 yaşlı Hannibal 2015-ci ildə siyasi mühacirətdə yaşadığı qonşu Suriyadan "Amal" yaraqlıları tərəfindən qaçırılıb və daha sonra Livanın hüquq-mühafizə orqanlarına təhvil verilib. 2017-ci ildə o, 1978-ci ildə Liviyada yoxa çıxan şiə imamı Musa Sədr haqqında məlumatları gizlətməkdə ittiham oilunub.