Qırğızıstanda "Salbuurun" ov festivalı keçirilib

Qırğızıstanın Bokonbayevo kəndində ənənəvi “Salbuurun” ov festivalı keçirilib.

Bu, köçəri mədəniyyətin vacib hissələrindən biri hesab olunur. Festival əsasən qartalla və tayqan itləri ilə ov, həmçinin oxatma kimi qədim ovçuluq üsullarını nümayiş etdirmək məqsədi daşıyır.

Bu tədbirdə iştirakçılar xüsusi təlim görmüş qartallarla tülkü və digər heyvanların ovlanmasını simvolik şəkildə təqdim edir, həmçinin milli geyimlər, atüstü bacarıqlar və qədim ənənələr nümayiş olunur. “Salbuurun” yalnız ovçuluq deyil, həm də qırğız xalqının tarixini, həyat tərzini və mədəni irsini tanıtmaq üçün keçirilən bir etno-festival kimi tanınır.

Hər il İsıkkul gölünün cənub sahilində keçirilən “Salbuurun” festivalı yüzlərlə qonağı bir araya gətirir. İştirakçılar ovçuluq və atçılıq sənəti nümayiş etdirir, həmçinin köçəri xalqların irsi ilə tanışlıq imkanı yaradırlar.

Festivalın təşkilatçıları Mədəniyyət Nazirliyinin dəstəyi ilə “Salbuurun”un UNESCO-nun Qeyri-Maddi Mədəni İrs Siyahısına daxil edilməsi üçün müraciət ediblər və hazırda bu müraciətə baxılır.