"Bu meymunların proqramları..." | Simonyan Moskva ilə münasibətlərdən danışdı

“Ermənistanda baş verənlərin Rusiya ilə münasibətlərə təsirini bildirənlər yəqin ki, öz teleaparıcılarının proqramlarını izləyirlər. Həqiqətən də həmin aparıcıların ritorikası ikili münasibətləri pisləşdirir”.

Bu barədə Ermənistan parlamentinin sədri Alen Simonyan bildirib. O, Rusiya Federasiya Şurası sədri Valentina Matviyenkonun Ermənistana səfərinə də diqqət çəkib.

“Mən bilmirəm, Samvel Karapetyan və ya başqasından aylıq 30-50 min dollar alan bu aparıcılar indi müdafiəçiyə çevriliblər? Qoy onlar gedib öz işləri ilə məşğul olsunlar və ölkəmizin daxili işlərinə qarışmasınlar”, ‒ deyə A.Simonyan qeyd edib.

Onun sözlərinə görə, həmin şəxslər Ermənistan vətəndaşlarında da qıcıq yaradır.

İrəvan rəsmisi “yenə də deyirəm, qoy səslərini kəssinlər və rədd olub getsinlər”, ‒ deyə əlavə edib.

Son olaraq isə A.Simonyan Rusiya telekanallarının Ermənistanda yayımının dayandırılmasına diqqət çəkib.

“Bu manqurtların və meymunların proqramları Ermənistanda çoxdan bağlanıb, onların Ermənistana girişi qadağan olunub, lakin dövlət telekanalları ölkəmizin daxili işlərinə qarışırlarsa, ən azından biz reaksiya verməli və onların evimizə girişini bağlamalıyıq”, ‒ deyə Ermənistan parlamentinin sədri vurğulayıb.