"Bütün variantlar masada saxlanılır" | ABŞ liderinin qərarı nə olacaq? - Baku TV

ABŞ Prezidenti Donald Trampın sözlərinə görə, Tehranın planlaşdırılan edamları dayandırması ilə bağlı məlumatlar onun İrana qarşı hərbi hücumdan yayınmaq qərarında mühüm rol oynayıb.

Tramp bunu Vaşinqtondan Florida ştatına uçmazdan əvvəl jurnalistlərə verdiyi açıqlamada qeyd edib.

“Məni heç kim inandıra bilmədi, mən özümü inandırdım. Dünən 800-dən çox edam planlaşdırmışdılar. Heç kimi asmadılar. Edamları ləğv etdilər. Bunun böyük təsiri oldu”, – deyə ABŞ Prezidenti sözlərinə əlavə edib.

O, İrana zərbə endirməmək qərarının qəti olub-olmadığını dəqiqləşdirmədiyini bildirib.

Ağ Ev isə bəyan edib ki, Tramp administrasiyası “bütün variantları masada saxlayır” və Tehrana gələcək zorakılıq hallarının ABŞ-nin sərt addımlarına səbəb ola biləcəyi barədə ciddi xəbərdarlıqlar edib.

Qeyd edək ki, İranda dekabrın 28-dən başlayan etirazlar qısa müddət ərzində geniş vüsət alıb. Məlumata görə, təkcə ötən həftə ərzində baş verən toqquşmalarda 2000-dən çox insan həlak olub. Bu hadisələr 1979-cu il İslam İnqilabından bəri ölkədə baş verən ən genişmiqyaslı daxili qarşıdurma kimi qiymətləndirilir.