"Crocus City Hall" işi üzrə məhkumlar koloniyalara paylanıb - Baku TV

“Crocus City Hall” konsert zalında baş vermiş terror aktı ilə bağlı işdə ömürlük həbs cəzasına məhkum edilənlərin hamısı müxtəlif regionlardakı koloniyalara paylanıb.

Bu barədə TASS agentliyinə hüquq-mühafizə orqanlarından bildirilib.

Məlumata görə, əksər iştirakçılar müxtəlif regionlardakı koloniyalara göndəriliblər, Moskva istintaq təcridxanalarında isə hələlik ömürlük həbs cəzası almamış məhkumlar qalıblar.

Qeyd edək ki, 2024-cü ilin martında Krasnoqorskdakı “Crocus City Hall” konsert zalında 4 nəfər odlu silahla ziyarətçiləri güllələyərək terror aktı törədib və zalı yandırıb. Baş Prokurorluğun məlumatlarına görə, təqribən 150 nəfər həlak olub, 336 nəfər xəsarət alıb. Terror aktından sonra cinayətkarlar Ukraynaya qaçmağa cəhd etsələr də, Bryansk vilayətində saxlanılaraq Moskvaya gətiriliblər.

Konsert zalına hücumun daha 15 iştirakçısı sonradan müəyyən olunub. Martın 12-də məhkəmə iş üzrə hökm elan edib. Terror aktının icraçıları və onların 11 köməkçisi ömürlük azadlıqdan məhrumetmə cəzasına, daha 4 köməkçi isə 19 il 11 aydan 22 il yarımadək koloniya cəzasına məhkum ediliblər. Hazırda zərərçəkənlərin və məhkumların vəkilləri hökmdən apellyasiya qaydasında şikayət ediblər.