"Əgər biz bunu etməsək, Rusiya və Çin edəcək" | Trampdan xəbərdarlıq - Baku TV

“ABŞ hətta çətin yolu seçsə belə, Qrenlandiyaya sahib olacaq”.

Bunu ABŞ lideri Donald Tramp Ağ Evdə iri neft hasilatı şirkətlərinin top-menecerləri ilə keçirdiyi görüşdə bəyan edib.

Ondan Qrenlandiyanın ABŞ-nin tərkibinə daxil olması üçün nə qədər vəsait lazım olacağı barədə fikri soruşulub.

“Mən hələlik Qrenlandiya üçün ödəniləcək pullardan danışmıram. Ola bilsin, bu barədə danışacağam, amma hazırda biz Qrenlandiya ilə bağlı nə isə etmək niyyətindəyik – bu onların xoşuna gəlsə də, gəlməsə də”, – deyə Ağ Ev rəhbəri bildirib.

O belə bir fikir ifadə edib ki, əgər ABŞ bunu etməsə, Rusiya və ya Çin Qrenlandiyanı ələ keçirəcək.

“Bu işi asan yolla həll etmək istəyirəm. Amma əgər asan yolla həll etməsək, çətin yolla həll edəcəyik. Mən Danimarkanın tərəfdarıyam. Amma bilirsiniz, 500 il əvvəl onların bir gəmisi oraya gəlib çatmışdı deyə, bu, torpağın onların olması anlamına gəlmir. NATO bunu anlamalıdır. Mən NATO-nun tərəfdarıyam. NATO-nu mən xilas etdim. Əgər mən olmasaydım, indi NATO olmayacaqdı”, – deyə D.Tramp əlavə edib.