"Forbes"in siyahısı: "Haber Global" "Türkiyənin Ən Yaxşı İşəgötürənləri 2026" sırasında - Baku TV

“Global Media Group”un tərkibinə daxil olan “Haber Global” televiziya kanalı “Forbes Türkiyə” və dünyanın aparıcı data və biznes analitikası platformalarından biri olan “Statista”nın birgə keçirdiyi “Türkiyənin Ən Yaxşı İşəgötürənləri 2026” araşdırmasının nəticələrinə əsasən, ölkənin ən yaxşı işəgötürənləri sırasında yer alıb və rəsmi sertifikata layiq görülüb.

Araşdırmanın metodologiyasına əsasən, siyahı Türkiyə əmək bazarında fəaliyyət göstərən şəxslər arasında keçirilən müstəqil onlayn sorğunun nəticələri əsasında formalaşdırılıb. 2025-ci ilin oktyabrından 2026-cı ilin fevralınadək davam edən araşdırma çərçivəsində iştirakçıların həm öz işəgötürənləri, həm də fəaliyyət göstərdikləri sahədəki digər şirkətlərlə bağlı 200 mindən çox qiymətləndirməsi toplanıb.

Araşdırma anonim və müstəqil şəkildə həyata keçirilib. Şirkətlərin müraciət və ya ödəniş yolu ilə siyahıya daxil olması mümkün olmayıb, qiymətləndirmə zamanı yalnız əməkdaşların rəyləri əsas götürülüb.

Ən yüksək nəticə göstərən 400 şirkət sırasında yer alan “Haber Global”ın bu uğuru telekanalın işəgötürən brendinin əməkdaşlar tərəfindən müsbət qiymətləndirildiyini göstərir.

“Haber Global”ın nüfuzlu siyahıda yer alması telekanalın daxili korporativ mədəniyyətinə, əməkdaşlara yanaşmasına və keyfiyyətli iş mühitinin formalaşdırılmasına verdiyi önəmin göstəricisidir. Bu nəticə eyni zamanda telekanalın media sektorunda etibarlı və cəlbedici işəgötürən mövqeyini gücləndirir.