"İran nüvə silahına sahib olmayacağına zəmanət verməlidir" - Baku TV

"Eskalasiya bütün regionu ağır nəticələri olan xaosa sürükləyir, İran və region əhalisi bunun qurbanına çevrilir".

Bu sözləri Fransa Prezidenti Emmanuel Makron Məsud Pezeşkianla telefon danışığı zamanı iranlı həmkarına söyləyib.

O, İranın region ölkələrinə qarşı həyata keçirdiyi "qəbuledilməz hücumları" dərhal dayandırmağa çağırıb.

"Yalnız yeni siyasi və təhlükəsizlik çərçivəsi hamı üçün sülh və təhlükəsizliyi təmin etməyə imkan verəcək. Belə bir çərçivə İranın ballistik proqramı, eləcə də regional və beynəlxalq sabitliyi pozan fəaliyyətlərindən qaynaqlanan təhdidləri aradan qaldırmaqla yanaşı, onun heç vaxt nüvə silahına sahib olmayacağına zəmanət verməlidir", – deyə Makron bildirib.

Pezeşkian isə öz növbəsində həmsöhbətinə ABŞ və İsrailin "qanunsuz təcavüz"ünün miqyası barədə məlumat verib.

"İran xalqı, hökuməti və silahlı qüvvələri heç vaxt gərginlik və münaqişəyə can atmayıb, lakin təcavüzkarlara müqavimət göstərməyin zəruriliyinə, öz ərazi bütövlüyümüzün və milli təhlükəsizliyimizin qətiyyətli, qanuni müdafiəsinə dair ən kiçik şübhəmiz belə yoxdur", – deyə İran Prezidenti qeyd edib.