"Kölgə" ləqəbli rəhbər kimdir? | Sinvarların liderlikləri davam edir

HƏMAS hərbi qruplaşmasının qanadlarından biri olan İzzəddin əl-Qəssam Briqadalarının rəhbəri Məhəmməd Sinvar təşkilatın yeni lideri seçilib.

Xarici medianın yaydığı məlumata görə, yeni rəhbər 2024-cü ilin oktyabrında İsrail Ordusu tərəfindən öldürülən HƏMAS lideri Yəhya Sinvarın kiçik qardaşıdır.

Hərəkatın yeni başçısı qruplaşmanın dirçəldilməsi üçün aktiv şəkildə çalışır, çünki onun döyüş imkanları 2023-cü ilin oktyabrından başlayan müharibədən sonra ciddi şəkildə zəifləyib.

İsrail Ordusunun məlumatına görə, döyüşlər zamanı HƏMAS-ın 30 min döyüşçüsündən 17 mini öldürülüb. Son bir neçə ay ərzində isə hərəkata yüzlərlə yeni yaraqlı qoşulub.

Qeyd edək ki, təşkilatın Qətərdəki siyasi ofisi kollektiv rəhbərliyə keçməyə qərar versə də, qrupun anklavdakı üzvləri buna tabe olmayaraq müstəqil hərəkət etməyi seçiblər.

Xarici medianın məlumatına görə, Məhəmməd Sinvarın təxminən 50 yaşı var. O, gənc yaşlarında HƏMAS-a qoşulub və avqustda öldürülən hərəkatın silahlı qanadının rəhbəri Məhəmməd Deyfin yaxın adamlarından biri olub.

Böyük qardaşından fərqli olaraq Məhəmməd Sinvarın İsrail həbsxanasında elə də “böyük xidmətləri” olmayıb. Bu səbəbdən də o, daha az tanınır. M.Sinvar uzun illər pərdə arxasında çalışdığı üçün “Kölgə” ləqəbini alıb.

Qeyd edək ki, yeni liderin məqsədi İsraillə razılaşma çərçivəsində HƏMAS-ın resurslarını bərpa etmək, hərəkatın Qəzza zolağında mövqelərini gücləndirmək və anklavda uzunmüddətli sülhə nail olmaqdır.