"Tesla" avtopilotunun sınağı əcəl ilə ötüşmək kimidir

“Tesla”nın avtopilotu ölüm risklidir”.

Bunu “Business Insider”in jurnalistlərinə “Tesla Full Self-Driving”in “Rodeo” layihəsinə qatılan sürücülər deyib.

Sınaqların “Rodeo” adlanması da təsadüfi deyil, çünki sürücülər özlərini öküz belindəki kovboy kimi hiss etməlidirlər.

“Tesla” avtopilotu üçün təhlükəli vəziyyətlər yaradılmalı və maşın vəziyyətdən çıxmalıdır. Bu tapşırıq proqram təminatının yaxşılaşdırılmasına hesablanıb, sadəcə sürücülərin həyatı əcəllə ötüşməli olur. Yəni yaranmış vəziyyətə görə edilən manevrlərdə ölüm riski pik həddədir.

Sürücülər özləri ilə yanaşı, ictimai yollarda digər insanlar üçün də təhdidin yarandığını deyiblər. Onların təbirincə desək, səkkiz saatlıq növbənin hər dəqiqəsi adrenalindir. Digər sürücü bir dəfə avtopilotun az qala velosipedçini vuracağını etiraf edib. Avtopilotun piyadaların üzərinə şığıdığı da olub. “Tesla” şirkəti belə situasiyalarla elektrik avtomobilinin zərər vermədən insanlara nə qədər yaxın dayana bildiyini öyrənmək niyyətindədir.

Qeyd edək ki, oktyabrın sonunda şirkət ucuz elektrik avtomobilini satışa çıxaracağına söz verib. Belə maşınların istehsalı isə 2025-ci ilin əvvəlinə nəzərdə tutulub.