Əraqçidən Davosdakı çıxışının ləğvinə cavab

İranın xarici işlər naziri Abbas Əraqçi Ümumdünya İqtisadi Forumundakı çıxışının ləğv edilməsinə münasibət bildirib.

Əraqçi bununla bağlı "X" sosial media hesabında paylaşım edib.

O, forum təşkilatçılarının bu qərarı ABŞ və İsrailin siyasi təzyiqləri fonunda qəbul etdiyini bildirib.

Əraqçi sözügedən qərarın ikili standart olduğunu qeyd edib və bunu intellektual iflas kimi dəyərləndirib.

Qeyd edək ki, Əraqçinin sözügedən forumda çıxışının ləğv edilməsi ilə yanaşı, Münxen Təhlükəsizlik Konfransında iştirak üçün ona göndərilən dəvət də geri çəkilib. Həmin qərar təşkilatçılar tərəfindən İranda etirazların sərt şəkildə yatırılması fonunda qəbul edilib.

Türkiyə Prezidenti Rəcəb Tayyib Ərdoğan isə qonşu dövlətə dəstəyini bildirib.

“İnanırıq ki, qonşumuz İran bu günlərin öhdəsindən gələcək”, – deyə Rəcəb Tayyib Ərdoğan sədrlik etdiyi kabinet iclasından sonra deyib.

Onun sözlərinə görə, Türkiyə İran hökumətinin mövcud böhranı dialoq və diplomatiya yolu ilə həll edəcəyinə ümid edir.

“Qonşumuz İran yeni bir çətinliklə üzləşir. Hamımız küçələrdə yazılan ssenarini izləyirik. Türkiyə olaraq əvvəldən prinsipial mövqeyimizi qorumağa davam edirik. Bizim fikrimizcə, problemlərin həlli danışıqlar masasındadır. Bölgəmizi xaosa apara biləcək hər hansı bir cəhdə qarşı çıxmağa davam edəcəyik”, – deyə Ərdoğan bildirib.