Rodriqes Venesuelanın müvəqqəti prezidenti kimi and içdi - Baku TV

Delsi Rodriqes Karakasda ölkənin Milli Assambleyasında Venesuelanın müvəqqəti Prezidenti vəzifəsinə and içib.

Parlament andiçməni canlı yayımlayıb.

“Mən Venesuela Bolivar Respublikasının konstitusiya ilə Prezidenti Nikolas Maduro Morosun icraçı vitse-prezidenti kimi and içmək üçün buraya gəldim. Bunu vətənimizə qarşı qanunsuz hərbi təcavüz səbəbindən Venesuela xalqına vurulan əzab-əziyyətə görə ağrı ilə edirəm”, – deyə Rodriqes mərasimdə bildirib.

O, Maduronu və onun həyat yoldaşı Siliya Floresi ABŞ-də girov saxlanılan qəhrəmanlar adlandırıb.

“Şərəfimlə and içirəm ki, Venesuelanın azad, suveren və müstəqil bir millət kimi öz arzusuna çatdığını görənə qədər dayanmayacağam”, – deyə o söyləyib.

Daha əvvəl Venesuela Ali Məhkəməsi vitse-prezident Delsi Rodriqesi müvəqqəti dövlət başçısı təyin edib. Bu qərar Ali Məhkəmənin Konstitusiya Palatası tərəfindən 3 yanvar 2026-cı il tarixində baş verən xarici hərbi təcavüz və Venesuelanın konstitusiyalı Prezidenti Nikolas Maduronun oğurlanması ilə əlaqədar qəbul edilib.

Delsi Rodriqes bu vəzifəyə Nikolas Maduronun Karakasda ABŞ-nin hərbi əməliyyatı nəticəsində saxlanılmasından sonra başlayıb. Maduro həyat yoldaşı Siliya Floreslə birlikdə ölkədən çıxarılıb.