Roma Papası nəyə əsasən seçiləcək? | Dünyanın gözü Vatikanda

Roma Katolik kilsəsinin 266-cı ruhani lideri kimi 12 illik fəaliyyətindən sonra Papa Fransisk 88 yaşında vəfat edib.

Geriyə isə suallar qalır. Yeni Roma Papası kim olacaq və nəyə əsasən seçiləcək?

Papa Katolik kilsəsinin başçısıdır. Roma katolikləri inanırlar ki, o, birbaşa İsa Məsihə qədər uzanan mənəvi xəttin davamçısıdır. Papa Müqəddəs Pyotrun sağ qalan varisi hesab olunur. Bu ona bütün Katolik kilsəsi üzərində tam və maneəsiz səlahiyyət verir və onu dünyada təxminən 1,4 milyard katolik üçün mühüm səlahiyyət sahibi edir.

Xatırladaq ki, dünyada yaşayan xristianların təxminən yarısı katolikdir. Papa dünyanın ən kiçik müstəqil dövləti olan Vatikanda yaşayır.

Ənənəvi olaraq papaların dəfn mərasimi çox təntənəli şəkildə keçirilsə də, mərhum Papa Fransisk şəxsən özü bu prosesin daha sadə və təvazökar formada aparılmasına dair sərəncam vermişdi. Papa Fransisk özü üçün daxili hissəsi sinklə örtülmüş sadə taxta tabut seçib.

"Yeni Papa kim tərəfindən seçilir?" sualına gəldikdə isə bu, Katolik kilsəsinin ən yüksəkrütbəli nümayəndələri – Kardinallar Kolleci tərəfindən həyata keçirilir. Papa vəfat etdikdə kardinallar Vatikanda iclasa çağırılır və ardınca seçki keçirilir. Səsvermə hər kəsə qapalı şəkildə baş tutur. Kardinallar istədikləri namizədə səs verir və qalib müəyyən edilənə qədər bu proses bir neçə gün davam edə bilər.

Keçmiş əsrlərdə səsvermə hətta həftələrlə, aylarla uzanıb. Seçkinin necə getdiyinə dair yeganə nişan gündə iki dəfə kardinalların səsvermə vərəqlərinin yandırılmasından qalxan tüstüdür: qara tüstü uğursuzluğu, ağ tüstü isə yeni Papanın seçildiyini bildirir. Ağ tüstü qalxdıqdan sonra yeni Papa adətən bir saat ərzində Müqəddəs Pyotr meydanına baxan eyvanda görünür.