Papa ilə bağlı Ağ Evdən açıqlama

Vaşinqton administrasiyası hesab edir ki, Vatikanın Qəzza zolağındakı vəziyyətin nizamlanması üzrə Sülh Şurasının işində iştirakdan imtinası təəssüf doğurur.

Ağ Evin mətbuat katibi Kerolayn Livitt bunu jurnalistlər üçün keçirilən ənənəvi brifinqində bildirib.

"Biz bunu gördük. Düşünürəm ki, bu, çox təəssüf doğurur", – deyə o, Müqəddəs Taxt-Tacın qərarını şərh edərkən bildirib.

"Əlbəttə, administrasiya Sülh Şurasına dəvət olunmuş hər kəsin iştirak etməsini istəyir. Bu, onlarla ölkəni əhatə edən qanuni təşkilatdır. Biz hesab edirik ki, Sülh şurasında iştirakdan imtina qərarı təəssüf doğurur", – deyə Livitt əlavə edib.

Ağ Evin mətbuat katibi həmçinin bildirib ki, sülhün bərqərar olması və qorunması ilə bağlı məsələlər siyasiləşdirilməməlidir.

Müqəddəs Taxt-Tacın qərarı bir müddət əvvəl Vatikanın dövlət katibi kardinal Petro Parolin tərəfindən açıqlanıb. O, Sülh Şurası haqqında danışarkən qeyd edib ki, bəzi çaşdırıcı məqamlar, aydınlaşdırma tələb edən bir sıra vacib məsələlər var.

Qeyd edək ki, yanvar ayında Müqəddəs Taxt-Tacın keçmiş dövlət katibi, kardinal Pietro Parolin Papa XIV Leonun ABŞ tərəfindən Qəzzanı idarə etmək üçün Yaxın Şərq məsələsinin nizamlanması məqsədilə Sülh Şurasına dəvət olunduğunu bildirib. Lakin həmin məsələnin nəzərdən keçirildiyini qeyd edərək Papa XIV Leonun iştirak edəcəyini təsdiqləməyib.