Ronaldo niyə sevgilisi ilə evlənmir? - Corcina etiraf etdi ki...

Kriştiano Ronaldo dünyanın ən reytinqli insanlarından biridir. Bu fakt isə onun bütün fəaliyyətlərinə populyarlıq qazandırır.

Futbolun yaşayan əfsanələrindən olan Ronaldoun şəxsi həyatı da fanatları tərəfindən diqqətlə izlənilir və müəyyən suallar yaranır.

Səudiyyə Ərəbistanının "Əl-Nəsr" klubunun portuqaliyalı hücumçusu Kriştiano Ronaldonun sevgilisi Corcina Rodrigezlə niyə hələ də evlənmədiyi barədə yaranan suallara aydınlıq gətirilib.

Bu barədə Corcinanın özü "Netflix"in "Mən, Corcina" realiti-şousunda danışıb. O, uzun müddətdir sevgilisi Ronaldodan evlilik təklifi gözlədiyini etiraf edib.

Kriştiano Ronaldo isə bu suala belə cavab verib: "Ona həmişə deyirəm ki, bir işarə hiss etdikdə evlənəcəyik. Corcina hər şeydə olduğu kimi bunda da nə demək istədiyimi yaxşı bilir. Bu, bir ildən sonra da ola bilər, yarım ildən, hətta bir aydan sonra da. Lakin mən 100 faiz əminəm ki, bu, baş verəcək".

Xatırladaq ki, Kriştiano Ronaldo 2018-ci ildə Corcinaya evlənmə təklifi edib, lakin onların toyu hələ olmayıb. Onlar 2016-cı ildən sevgilidirlər.