Rus qüvvələri "Starlink"ə alternativ axtarır

Rusiya dronlarında peyk rabitə sistemi terminallarının bloklanması pilotsuz aparatların idarə edilməsində yeni texnologiyaların tətbiqinə yol aça bilər.

Bu fikri ehtiyatda olan Hərbi Hava Qüvvələri zabiti, radioelektron mübarizə üzrə ekspert Anatoliy Xrapçinski “Kiyev24” telekanalının efirində səsləndirib.

O bildirib ki, Ukrayna düşmən pilotsuz uçuş aparatlarının məhv edilməsi üçün ucuz kinetik vasitələrə ehtiyac duyur.

Ekspertin sözlərinə görə, adi radioelektron mübarizə vasitələri zərbə dronlarındakı “Starlink” terminallarını bloklaya bilməz. Bunun üçün birbaşa orbitdə yerləşən peyklərə təsir göstərmək lazımdır ki, belə məsafəyə təsir edə biləcək sistemlərin gücü olduqca böyük olmalıdır.

A.Xrapçinski qeyd edib ki, hava hücumundan müdafiə sahəsində mərhələli sistemə qayıtmaq vacibdir. Bu sistemdə radioelektron mübarizə yardımçı rol oynayır, əsas yük isə aşkar etmə, ələ keçirmə və kinetik məhvetmə vasitələrinin üzərinə düşür.

Onun sözlərinə görə, ölkə ərazisi üzərində uçan hava hədəflərini məhv etmək üçün daha ucuz və effektiv vasitələr tapılmalıdır.

Ekspert vurğulayıb ki, hətta Rusiya Ordusu “Starlink” sisteminə çıxışı itirsə belə, alternativ rabitə üsullarına keçə bilər.

Cənub Müdafiə Qüvvələrinin sözçüsü Vladislav Voloşin isə bildirib ki, “Starlink” terminallarının söndürülməsindən sonra rus qüvvələrinin Zaporojye istiqamətində kamikadze dron hücumları azalıb.

Onun sözlərinə görə, düşmən qoşunlarında rabitə və piyada hücumlarının idarə olunması ilə bağlı müəyyən çətinliklər yaranıb.

Daha əvvəl isə 429-cu “Axilles” ayrıca pilotsuz sistemlər briqadası komandiri Yuri Fedorenko rus qüvvələrinin “Starlink”ə alternativ axtardığını bildirib.

Onun sözlərinə görə, bu məqsədlə “Wi-Fi” körpüləri qurulur, optik lif xətləri çəkilir və LTE rabitə qüllələri yerləşdirilir.