Rusiya başa düşmür ki... | Putin Ukraynada hakimiyyəti dəyişdirmək istəyir?

Rusiya Ukrayna tərəfində kiminlə hər hansı saziş imzalamalı olduğunu başa düşmür, çünki sabah başqa lider hakimiyyətə gələr və vəziyyət dəyişə bilər.

Ona görə də Ukraynada seçkilərin keçirilməsi üçün BMT və bir sıra ölkələrin himayəsi altında müvəqqəti administrasiya tətbiq edilməlidir.

Belə bir təkliflə Rusiya Prezidenti Vladimir Putin çıxış edib.

Putinin sözlərinə görə, seçkilərdən sonra sülh müqaviləsi üzrə danışıqlar başlaya bilər.

“BMT-nin himayəsi altında, ABŞ ilə, hətta Avropa ölkələri ilə, əlbəttə ki, tərəfdaşlarımız və dostlarımızla Ukraynada müvəqqəti idarəçiliyin tətbiqi imkanlarını müzakirə etmək mümkün olardı. Demokratik seçkilər keçirmək, bacarıqlı və xalqın etimadını qazanan hökuməti hakimiyyətə gətirmək üçün”, − V.Putin qeyd edib.

O xatırladıb ki, Şərqi Timorda, Yeni Qvineyada və keçmiş Yuqoslaviyanın bəzi hissələrində BMT-nin himayəsi altında xarici idarəetmənin tətbiqi ilə bağlı artıq presedentlər olub. Eyni zamanda o qeyd edib ki, bu, variantlardan yalnız biridir.