Rusiya gündəmini silkələyən xəbər | Vəzifədən gedən şəxs görün kim imiş

Rusiyanın Prezident Administrasiyası rəhbərinin müavini Dmitri Kozak istefa verib.

Ölkə Prezidentinin mətbuat katibi Dmitri Peskov D.Kozakın könüllü olaraq vəzifədən getdiyini açıqlayıb.

Bildirilib ki, müavinin istefa tələbi qəbul edilib. Lakin hələlik məsələ ilə bağlı rəsmi fərman yoxdur.

Qeyd edək ki, 1958-ci ildə Ukraynanın Kirovoqrad vilayətində doğulan Dmitri Nikolayeviç Kozak müxtəlif vəzifələrdə çalışıb. Rusiya Baş nazirinin müavini, regional inkişaf naziri, Prezidentin səlahiyyətli nümayəndəsi və digər yüksək işləri icra edən D.Kozak 2020-ci ildən etibarən Prezident Administrasiyası rəhbərinin müavini vəzifəsində çalışıb.

Xatırladaq ki, ABŞ-nin “The New York Times” nəşri avqustun əvvəlində öz mənbələrinə istinadən yazıb ki, hələ 2022-ci ildə D.Kozak Prezident Vladimir Putinə Ukraynaya qoşun yeritməyi məsləhət görməyib. O, 2025-ci ildə sülh danışıqlarına başlamağı və Rusiyada daxili islahatlar aparmağı, o cümlədən də təhlükəsizlik qüvvələrini hökumətə tabe etməyi təklif edib.