Rusiya ilə bağlı gizli proses üzə çıxdı

2025-ci ildə Rusiyada kənd yerlərinin tənəzzülü davam edib. Son bir il ərzində rəsmi olaraq azı 266 yaşayış məntəqəsi ləğv edilib, indi bunlar tamamilə boşaldılmış kəndlərdir.

Bu barədə Ukraynanın Xarici Kəşfiyyat Xidməti məlumat yayıb.

Bildirilib ki, yaşayış məntəqələrinin yoxa çıxması üzrə ikinci dəfə lider Kostroma vilayəti olub, onun ardınca Novqorod gəlir. Bu iki region birlikdə ləğv edilən bütün yaşayış məntəqələrinin təxminən dörddə üçünü təşkil edib.

Ukraynanın Xarici Kəşfiyyat Xidmətinin məlumatına görə, üçüncü yerdə Perm vilayəti qərarlaşıb. Burada artıq təkcə kəndlərin “ölümü” qeydə alınmır, həm də azsaylı əhalisi olan ucqar yaşayış məntəqələri məqsədli şəkildə boşaldılır. Kiçik kəndlərin bir hissəsi isə infrastruktur boşluqlarını qismən doldurmaq üçün daha iri yaşayış məntəqələrinə birləşdirilir.

“Əslində, söhbət inkişafdan deyil, tənəzzülün hüquqi rəsmiləşdirilməsindən gedir. Rusiya regionları ardıcıl şəkildə əhalisini itirir, boşaldılmış kəndlərin əraziləri isə sadəcə, təsərrüfat ehtiyacları üçün istifadə olunur. Bu vəziyyət Moskvanın guya əyalətləri dirçəltməli olan yeni “Baş Məskunlaşma Sxemi” barədə səsləndirdiyi gurultulu bəyanatları ilə kəskin ziddiyyət təşkil edir”, – məlumatda deyilir.

Ukrayna kəşfiyyatının fikrincə, hesabat ancaq dərin demoqrafik böhran və digər problemləri təsdiqləyir: tibbi xidmət, təhsil və iş imkanları olmayan yarıboş kəndlər heç kimi cəlb etmir, “əhalinin paylanması” cəhdləri isə uğursuzluğu kosmetik şəkildə ört-basdır etməkdən başqa bir şey deyil.

“Yekunda Rusiya bir neçə iri aqlomerasiya istisna olmaqla sistemli tənəzzülü nümayiş etdirir – depopulyasiya, kəndlərin yoxa çıxması və inkişaf fərqi getdikcə dərinləşir, gurultulu proqramlar isə sürətlə boşalan reallığın kağız dekorasiyası olaraq qalır”, – Ukraynanın Xarici Kəşfiyyat Xidməti vurğulayıb.